तुला चर्चेत घेणेही अताशा टाळतो आहे

.

तुला चर्चेत घेणेही अताशा टाळतो आहे
तुझे हे सोवळेपण मी जरा सांभाळतो आहे

.
किती रंगात मिसळावे तुझे तारुण्य मिसळेना
अश्या निर्भेळ रंगाला कधीचा भाळतो आहे

.
कसा घोंगावतो आहे चिडूनी वात मदनाचा
कुणी सांगितले त्याला, तुला कुरवाळतो आहे

.
तुझा हा स्पर्श कांतीचा फुलवतो आस जगण्याची
तुझ्या श्वासात मिसळोनी श्वास गंधाळतो आहे

.
तुझ्या डोळ्यात पाहू दे ! जरा अंदाज घेऊ दे !
जगाच्या लुप्त होण्याचे, विवर पडताळतो आहे

- रमेश ठोंबरे